香港乒乓網 - Powered by Discuz! Board

標題: 希望有高人指點點教小朋友打波。 [打印本頁]

作者: sliverx 時間: 2021-10-14 10:14 標題: 希望有高人指點點教小朋友打波。

希望有高人指點：
小女自小開始打波，基本功尚算紮實，小二已經是學校校隊，可以參加的公開比賽都會參加，每星期都會同其他小朋友練球，一星期練球最少4日，打了球五年，但上到場和其他小朋友比試，總是輸，無論是正式比賽，或是同球友練波，一上場基本技術就不能發揮，發球沒變化，接發球總是食旋，有人話可以參加多些比賽改善，有人話要調整心理質素，但打比賽其實沒有停過，也試過多鼓勵，但完全沒用。
練波完全冇問題，我自己同小女打都唔覺得有問題，衹是和其他人打就會輸。我唔係怪獸家長，要小朋友打出咩成績，只係想小女可以係比賽，發揮到自己技術，將練波成果打出來，作為父母已經欣慰。
希望有高人指點，做父母可以點做？要放棄唔再打？換教練？再練多d?轉打法？

作者: 乒乓小王子 時間: 2021-10-14 10:52

我諗只有小朋友家長或私人教練或熟識你子女的人的睇法先相對有用，因為要解決問題先要搵到原因是甚麼，這才會有效解決問題，網友如果完全唔識你子女，或唔熟，一個叫你改打法，一個叫你再練多波，一個叫你放棄唔再打，這些都是主觀同武斷嘅回覆，可能令你走嘅路更加兜圈，或行錯路。

[ 本帖最後由乒乓小王子於 2021-10-14 10:53 編輯 ]

作者: sliverx 時間: 2021-10-14 10:59 標題: 回復 2# 乒乓小王子的帖子

作者: Kenixting 時間: 2021-10-14 11:06

點解你唔直接問你教練？

作者: 我＝新手 時間: 2021-10-14 11:15 標題: 回復 1# sliverx 的帖子

教練唔知道貴子女有以上問題？

「發球沒變化」
可以再練多啲
例如練到同一個動作可以發到唔同旋轉/落點
「接發球總是食旋」
自然「一上場基本技術就不能發揮」
亦都係要練多啲，練到識得判斷個波嘅旋轉

作者: 求其 時間: 2021-10-14 11:44

最合適還是問回教練，但從小二已經是校隊，打了五年，每星期打4天？但疫情都2年啦，這都好大影響，實際應該打不到5年？另外小朋友年紀還小，心智未成熟，出去比賽會有點怕導致打不出平時訓練的技術水平，這是很正常，（比賽不是贏竟是輸都很正常）

成人都一樣，平時練習時都像國家隊模樣，當正式比賽時都會比賽緊張打不出平日的水平，能打出7成或以上水平也相當不錯了。

所以不應用勝負衡量小女成續，估計不可能打5年比賽都是敗績，未賞一勝？

慢慢來，小女年紀還小。多參加比賽增加自信心，增加比賽經驗，增加抗衡對手的經驗，慢慢成長。

作者: y0y0_pang 時間: 2021-10-14 11:54

個人認為，教練既教法都好重要。

個人覺得好多教練除左識教基本功之外，但其實實戰技巧打法，好多教練都未必識教到。

小弟而家幾十歲人，好多舊時錯誤動作而家已定形。但小弟目標希望可能係乒總區賽都有得打下。
於是同教練一齊針對教學目標去計劃，動作唯有盡執啦，但盡量每次都以訓練戰術為主。
例如開咩球，下一球應該點接等等啦。

不過最重要，想贏波就要學識輸，每次輸波拍低片，再同教練研究下點解輸，輸d乜，有咩要加強訓練。
下次再遇到咁情況，可以點打咁。

作者: garytang2018 時間: 2021-10-14 12:28

先唔講打波輸贏，小朋友做運動就係為身心健康。無論係自己嚷住要玩定家長帶去興趣班慢慢愛上，打波練波令小朋友學會堅持，學會思考，學會面對失敗，勝利中得到自信，已經係成功。如果家長覺得做咗好多無牌攞，好似無所得，可能搞錯方向。如果小朋友對常敗好在意，其實應該開導佢人人天份唔同，對手亦好努力練波，要贏就諗辦法。
講到辦法，練波無敵但臨場不濟，絕對係小朋友常事。佢吔會記住人而唔係記住個波，可能對甲組教練都唔食發球，但對其他小朋友食上天際，係因為佢記住點樣接你發球，而唔係球質。除咗發球，佢甚至會記住你點樣跑，你會覺得佢同你打回球個位好絕，對其他人好普通甚至好差。

解決辦法係同佢打多啲球局，對小朋友比賽同球局其實一樣，佢吔唔識分，只在乎輸贏。但球局搵啲同大人玩既，因為大人會放水，未見過對小朋友狠下手既波友。如果小朋友打小朋友又成日輸，會加重心理負擔，而且同儕間既在乎勝負又加重失敗感。

再落離係簡化技術，佢唔識認波就簡單啲，接發唔好搓等等，推拉擰，減少選項會令佢容易選擇啲。打相恃就打死端線，最緊要佢頂得住，咁佢會操作容易啲。

[ 本帖最後由 garytang2018 於 2021-10-14 12:46 編輯 ]

作者: sliverx 時間: 2021-10-14 13:18

同意各位意見，亦明白運動係為身心健康，但咁打法，打親都輸，好難身心健康，就算我話唔緊要，下次再比心機打，其實只係呃佢繼續打落去。玩一樣遊戲有贏有輸，先有意義。
其實教練都知，教練都有心教，但感覺教練和我一樣無助，早2年都好積极去推，近2年都灰灰地。

作者: sum 時間: 2021-10-14 14:07 標題: 回復 10# sliverx 的帖子

打比賽真係講心態，要有想贏決心，如果小朋友缺乏嘅，就當乒乓球係課外興趣活動，無得勉強。

作者: garytang2018 時間: 2021-10-14 14:10

有時成人會不自覺將自己既期望當成小朋友既期望，亦會忘記乒乓球既本質。好多乜旋都唔識既人，打滴滴仔都好開心。

作者: ronald1834633 時間: 2021-10-14 14:18

其實樓主女兒是否喜歡乒乓球？

作者: 速鳥 時間: 2021-10-14 16:49

去到谷底先會反彈

有種打法叫做「吸力」，如果你囡囡打波總是向前移動，唔輸就奇怪，因為好多學得一年波但教佢打吸力，好快會見到贏比賽。

作者: 青見人 時間: 2021-10-14 17:16

引用:

原帖由 sliverx 於 2021-10-14 10:14 發表
希望有高人指點：
小女自小開始打波，基本功尚算紮實，小二已經是學校校隊，可以參加的公開比賽都會參加，每星期都會同其他小朋友練球，一星期練球最少4日，打了球五年，但上到場和其他小朋友比試，總是輸，無論是正式比賽，或是同球友練波 ...

網友已講解不少，確實沒直接看過你小朋友打球或不認識你小朋友係不能作出中肯準確的方法，以下有幾個問題：
1 小朋友喜歡打球嗎？
2 小朋友有考章嗎？
3 學球至今係從沒贏過一場波，還是未有贏取任何獎項？
4 一星期打四天，全是跟教練打？還是一天私人三天和其他小朋友打？
5 私人訓練一星期多少時數？
6 和其他小朋友打，係訓練？還是計分？
7 有否打青苗？
8 疫情下有否停止練球？

有幾點要清楚：
1 要把每次練出的技術於比賽完全發揮係不可能
2 於比賽能發揮60-70%較平時打球已很不錯
3 沒有掌握好接發球的技巧，再強再扎實的基本功也沒用。

作者: sliverx 時間: 2021-10-14 20:52 標題: 回復 15# 青見人的帖子

1 小朋友喜歡打球嗎？感覺打波時開心
2 小朋友有考章嗎？ 3年級考到金章，之後無再考
3 學球至今係從沒贏過一場波，還是未有贏取任何獎項？打計分，打10場，輸9場
4 一星期打四天，全是跟教練打？還是一天私人三天和其他小朋友打？
以前： 2日私人教練，1日上堂，1日同其他小朋友打計分，有時同我打，因爲我自己鍾意打。
5 私人訓練一星期多少時數？以前4小時，而家2小時（半放棄狀態）
6 和其他小朋友打，係訓練？還是計分？計分
7 有否打青苗？有，第三階段
8 疫情下有否停止練球？除體育館冇開外，都有練。

作者: 速鳥 時間: 2021-10-14 21:18

引用:

原帖由 sliverx 於 2021-10-14 20:52 發表
1 小朋友喜歡打球嗎？感覺打波時開心
2 小朋友有考章嗎？ 3年級考到金章，之後無再考
3 學球至今係從沒贏過一場波，還是未有贏取任何獎項？打計分，打10場，輸9場
4 一星期打四天，全是跟教練打？還是一天私人三天和其他小朋 ...

打乜板及膠，可以的話形容小小打法

[ 本帖最後由速鳥於 2021-10-14 21:26 編輯 ]

作者: 金擇魚 時間: 2021-10-14 21:42

雖然青苗第三階段唔係乜野成績
但係冇可能打計分，打10場，輸9場
女仔有優惠都冇可能入到

作者: 金擇魚 時間: 2021-10-14 21:45

定係平時打球局比賽D對手太勁
打到佢乜技術都用唔到

作者: y0y0_pang 時間: 2021-10-14 21:46

應該問自己，有冇坐低同小朋友認真傾下計？了解下佢先？

作者: 青見人 時間: 2021-10-14 23:18

引用:

原帖由 sliverx 於 2021-10-14 20:52 發表
1 小朋友喜歡打球嗎？感覺打波時開心
2 小朋友有考章嗎？ 3年級考到金章，之後無再考
3 學球至今係從沒贏過一場波，還是未有贏取任何獎項？打計分，打10場，輸9場
4 一星期打四天，全是跟教練打？還是一天私人三天和其他小朋 ...

2 小朋友有考章嗎？ 3年級考到金章，之後無再考
(基本功應該不錯)
3 學球至今係從沒贏過一場波，還是未有贏取任何獎項？打計分，打10場，輸9場
(是指打球局嗎？大人？中學生？同齡小朋友？
如果對手係同齡，很難十場輸九場)
4 一星期打四天，全是跟教練打？還是一天私人三天和其他小朋友打？
以前： 2日私人教練，1日上堂，1日同其他小朋友打計分，有時同我打，因爲我自己鍾意打。
(是否學球至今仍是同一教練？定兩日有不同教練？和你打的時候，你有否發現小朋友有甚麼問題？如果你有打開波，你應該有能力分析自己贏甚麼？對手輪甚麼？)
5 私人訓練一星期多少時數？以前4小時，而家2小時（半放棄狀態）
(都是同一教練嗎？冇轉過？)
6 和其他小朋友打，係訓練？還是計分？計分
(又是否打十輸九呢？)
7 有否打青苗？有，第三階段
(今屆青苗第三屆段嗎？如果上到第三屆段其實冇理由輸多贏少，點計都一定要贏半數以上才有機會升第三階段。)
8 疫情下有否停止練球？除體育館冇開外，都有練。
(技術應該唔會退太多。)

作者: ronald1834633 時間: 2021-10-14 23:51

感觉上樓主對乒乓球的熱誠在女兒之上，是不是女兒輸波樓主都在場？可能樓主不知不覺間為女兒帶來壓力！小朋友打波玩樂，又有其他小朋友一起當然開心。她會主動犧牲玩樂時間去練波嗎？入到青苗第三階段不算差了，可能樓主感覺上有些不合比例。

作者: vr1717 時間: 2021-10-14 23:58

同教練溝通下

作者: 冇力 時間: 2021-10-15 16:36

玩下球，唔是輸就赢……
打乒乓是開心快樂活动
你一定要佢赢……变左压力……

作者: 寫工 時間: 2021-10-20 16:04

感覺家長興趣比小朋友大。。。

論技術，有教練keep住練一定會慢慢上
純粹以實戰角度黎講，真係要打多d比賽，最好有場外指導做檢討
基本功未扎實ge人去打比賽面對極少基本功但有比賽小技巧ge人係無得打ge

作者: edenbaba 時間: 2021-10-21 10:49

推薦你睇呢本書
https://btgalleries.breakthrough.org.hk/products/9789888562541

作者: 五隻蟻 時間: 2021-10-21 12:08 標題: 回復 1# sliverx 的帖子

小朋友輸波時,輸波後心情點樣?
有冇同佢傾過,問佢想喺乒乓球方面點樣?
想打到成績定玩得開心就Ok?(我識得係有小朋友冇爭勝心)

作者: 寫工 時間: 2021-10-26 16:08 標題: 回復 26# edenbaba 的帖子

歡迎光臨香港乒乓網 (http://hkttf.com./)