香港乒乓網 - Powered by Discuz! Board

標題: 大圍乒乓球教室慘被掃場 [打印本頁]

作者: 戰地記者 時間: 2017-6-7 01:43 標題: 大圍乒乓球教室慘被掃場

作者: 戰地記者 時間: 2017-6-7 01:44

候任特首林鄭月娥2009年擔任發展局局長時推出一系列活化工廈措施，吸引商戶進駐工廈經營活動場所，惟去年迷你倉大火後，政府即大力打擊違契經營的工廈場所。去年7月至8月，地政總署鎖定的15幢首輪執管目標涉違契工廈單位，當中位於大圍的乒乓球教室，經營8年後收到最後通牒，負責人說：「原本唔係想去工廈，但係設施嚴重不足，乒乓球訓練場只能瑟縮於工廈。」

記者：梁佩珊
隱身於工廈的體育界因違契被陸續清場。地政總署於去年8月鎖定安豪工業大廈為首輪執管目標，當中於2樓及5樓兩單位皆屬乒乓球訓練場「乒乓匯智」，總監董先生指，體育界是「無得揀」才於工廈違規經營，因為面積足以容納球枱，「特首話要發展體育，我睇完（新聞）好失落，因為完全冇發生喺我身上」。
本港6間乒乓球會陸續搬上工廈，以「乒乓匯智」為例，3,000呎單位可放置6張球枱，「現實係如果繼續用康文署嘅場，一邊去現場排隊，要一邊電腦鬥快，仲要好多人炒場，買黃牛飛係影響學生練習」。他說，如果被清場，可能只能搬到其他工廈經營，「因為無路可走」。
董生指，自去年8月署方由每一至兩個月巡查一次，至近來頻密至每星期一次，執法方式亦由巡查加強至於門外守候拍攝練習情況，「一嚟就係『總之你係違法』，冇空間冇時間幫我哋過度呢段時間，以為趕走就算」，乒乓球會日前亦收到署方警告信指如本月19日前未能糾正，署方可能收回單位。
民主黨立法會議員鄺俊宇批評，工廈用舊政策規管新社會發展不合時宜，「政府好似連邊啲人用緊工廈都唔知，人去樓空最安全，但又冇地方供應俾體育文娛，咁佢哋仲有咩地方生存」。他續指，政府動用319億元興建啟德體育園，但忽視為普及體育提供場地。灣仔區議員楊雪盈指，工廈空間可彌補政府場地不足，惟現時工廈政策以至體育政策不近人情，「林鄭喺2009年話要活化工廈，7月上任後可否完成埋手尾﹖」
地政總署回覆稱，安豪大廈地契條款訂明只可作工業及倉庫用途，由於該工廈有處所領有消防處發出的製造及/或貯存危險品牌照，違契用途引來公眾進出該違契工廈單位以使用其設施或服務，或涉及幼童或長者出入，因此有關個案屬本署的首輪執管目標。地政處於5月發現2樓I室有乒乓球活動，違反地契條款，並於6月5日向業主發警告信，如14天內未有糾正違契用途，可收回單位。

關教練於乒乓匯智教乒乓球已兩年，3個工廈球會合共有80名教練。（黎樹雄攝)

作者: 戰地記者 時間: 2017-6-7 01:44

運動精英搖籃工廈乒乓球室盛產港隊代表

立法會議員鄺俊宇（右二）與灣仔區議員楊雪盈（右一）批評，政府現時的工廈政策打擊新興產業。（黎樹雄攝）

現時全港工廈乒乓球會共有6間，其中3間球會出產不少體育人才，3間球會共有5人曾代表香港出賽，其中1人來自乒乓匯智。現時政府的青苗乒乓球培訓計劃50人、精英隊及少兒精英隊13人、及香港青年代表隊14人（即近半數人）皆來自3間工廈球會。

乒乓匯智8年來訓練近萬人，總監董先生說，乒乓球並非單純的運動訓練，更是心智成長訓練，「我同地政講，呢度唔係畀小朋友玩嘅地方，而係可以從體育訓練中，佢可以學習做人道理同訂立目標，但地政係不近人情」。他指自己亦是從乒乓球訓練中學習成長，成立球會，「訓練到佢哋出去比賽可以看輕人生成敗得失，贏輸真係唔係咁重要，而係點樣比賽中改善弱點，呢個過程贏咗先係贏家，而唔係攞獎叫做贏」。
15歲的黃同學是乒乓匯智的學生，他指由於工廈場地寬闊，比起其他場地有助練習，「如果練習場地係商場，係唔夠工廈場地大，而且私隱度不足，呢度係比較方便」，他又指如工廈乒乓訓練場消失對學員而言太可惜。
記者梁佩珊

作者: (=^x^=) 時間: 2017-6-7 02:19 標題: 假如工廈再沒有乒乓球室？

香港乒乓球發展會怎樣？

作者: egghead1969 時間: 2017-6-7 04:55

基本上正苦眼中是成本、收費問題，政府點會理你

作者: zeio 時間: 2017-6-7 06:31

睇標題我以為係有神人踢館血洗

作者: williamkeung 時間: 2017-6-7 07:10

乒乓球這樣健康活動，如不能在工厦做，真想問問政府乒乓室還可在哪裡做呢？要租街街舖？最後就苦了家長!

作者: egghead1969 時間: 2017-6-7 08:20

好老實，如果寫字樓開得補習社，工廈區既寫字樓做唔做到先，租價差幾遠先，香港球會單靠上堂定點

作者: zeio 時間: 2017-6-7 08:46

引用:

原帖由 (=^x^=) 於 2017/6/7 02:19 發表
香港乒乓球發展會怎樣？

冇分別，依然係十年如一日

體育項目發展，係關乎整個香港對體育所持既態度，係價值觀既問題

英國向中國學習「舉國體制」，日本亦已靠攏，點解要敢做？

對於乒乓球，香港既情況，北美一樣存在，大陸第一代移民家庭既父母都以乒乓球作為仔女入大學既踏腳石，青年到成年呢個階段人才流失現象非常嚴重，大量有潛力發展既選手都會選擇升學，選擇乒乓球既少數一係讀唔到書，一係真的非常熱愛乒乓球

[ 本帖最後由 zeio 於 2017-6-7 09:02 編輯 ]

作者: Manley 時間: 2017-6-7 09:28

吾好玩啦出14個港青，邊個呀

作者: cfire555555 時間: 2017-6-7 09:38

依然係土地問題

作者: mmfc821 時間: 2017-6-7 09:41

咁咪唔會再有乒乓教室存在，各大體育館會日日爆場，一般人都應該再BOOK唔到場

作者: rckw 時間: 2017-6-7 09:59

生產港青算唔算製造業 = 工業

作者: 乒乓在線 時間: 2017-6-7 10:03

要問"快旋攻擊"是否要業主入紙改契就可解決，補錢金額大不大

[ 本帖最後由乒乓在線於 2017-6-7 10:05 編輯 ]

作者: airwaves 時間: 2017-6-7 10:30

林鄭講野都信,高官講野聽住先

作者: 乒乓人 時間: 2017-6-7 10:45

直接唔比 "乒乓球波樓" 註冊公司啦

作者: TTYY123 時間: 2017-6-7 10:52

咁好多乜班乜班都無得玩

作者: 速鳥 時間: 2017-6-7 12:15

搬地方咪得囉，唔用講到殺左佢全家，生果報製做新聞，想唱臭政府。

作者: samson2012717 時間: 2017-6-7 12:20

搬地方就解決到？

作者: williamkeung 時間: 2017-6-7 12:36

可有提議搬去哪裡？其實香港哪裡工厦還可搞乒乓球室？

作者: KKFan 時間: 2017-6-7 13:02

乒乓球與危險品應分開,
建議政府更改法例,將部份近住民區嘅區域工厦不可存放危險品丶因為存放危險品地方一旦發生事故丶不止影響大厦本身丶附近民區也將受到毒氣波及,為了市民安全,不應存放危險品,收改法例後丶也可讓一些文娛活動可堂堂正正及安全哋入主工厦丶真真正正做到活化工厦

作者: williamkeung 時間: 2017-6-7 13:16 標題: 回復 26# 的帖子

支持支持

作者: super_phoenix 時間: 2017-6-7 13:21

比工廈生存咁康文署就少咗人book場，使用率下降，即係政府少咗收入，咁政府梗要ko工廈啦。政府

作者: KKFan 時間: 2017-6-7 13:38 標題: 回復 28# 的帖子

政府絕對不會怕這些蠅頭小利被搶走丶反而工廈少了乒乓球活動丶轉移到康民場地打波丶反而大家更難訂場

作者: 見義勇為 時間: 2017-6-7 20:17

不過繼續去旅行，睬你都傻

作者: 速鳥 時間: 2017-6-7 20:29

有時運動背後，還有球會辦球的目的，唔雖要理會有冇錢。

作者: 145 時間: 2017-6-7 23:19

十卜KKFan 師兄，有危險品存放的工廈的確不應該開乒乓球館，出咗事就後悔莫及，人命關天，但政府都可以同時做d正面事情推動乒乓球運動

，如KKFan 師兄建議，book唔到場唯有玩第樣野。

引用:

原帖由 KKFan 於 2017-6-7 13:02 發表
乒乓球與危險品應分開,
建議政府更改法例,將部份近住民區

[ 本帖最後由 145 於 2017-6-7 23:22 編輯 ]

作者: simonwong 時間: 2017-6-9 17:46

提示: 作者被禁止或刪除內容自動屏蔽

歡迎光臨香港乒乓網 (http://hkttf.com./)