Penguin

新年買給自己的禮物

唔想睇無聊引言可直接飛掉此層
「下!你又買長膠?!係咪玩野呀!」
「咩話?又長膠?你會學壞手勢架!」
「唉,你冇得救啦!」
我唔再花口水解釋,我已冇得救,你地由我放棄治療啦!
繼本年度最後訂單後,小弟啱啱重回深水埗購入新乒器,隨即約左朋友試打
講起個間野就好笑
我上次買龍張,佢下個月做減價
我上次買雙魚40+,佢下個月又有減價
個度點都蝕左100蚊,都唔知好彩定黑仔
真係好似間舖(應該係牌子公司至真,係佢地落order出優惠)專登玩我咁,希望今次唔會又係咁掛
有人可能問點解篇野咁快打完
其實我前排無聊得閒就寫定引言同排版
只係淨返評測未寫,務求以最快速度獻上
小弟唔識控制圖片位置,編排可能好亂,所以將分層講解,請大家見諒
之後o既評測實屬一個玩左乒乓半年的新手所寫,準確性大家有目共睹,只可作為意見
照片只用手機影亦不是影得太好,請各位多多包涵
本帖將把本次買的板同膠分為幾層分析
再嘗試進行簡單比較,如有誤請各位師兄指正
備註:此評測寫下已久,日期完全錯誤可無視

Penguin

首先登場o既係一塊幾冷門o既五夾削球板
Tibhar Stratus Power Defense (下稱PD)
非常抱歉忘了影一下淨板就上左膠
PD正反反長,配置正手 neo狂飆3 39度
反手就配 Tibhar grass d. tecs 0.9mm長膠

一拎起PD, 唔! 手柄設計幾好,揸落好舒服
磅一磅,竟然得79克,應該係削球板中的罕有重量
再滴下波...嘩! 聲音好好聽,有軟中帶硬之感,相信此能在防守中不失回擊的力量,配合現代削球反攻打法
另外,覺得此板設計幾靚,顏色、木紋(可惜無影淨板)、設計都好中意,個人手汗極多,淺色o既木柄成個水漬好尷尬,不過最緊要好打姐
                  
                         PD試打後感
真係好輕,擺速快,打落好輕鬆,用力打都唔攰
但奇怪在唔虛,好扎實,應該係厚度很薄影響
因底板較薄,有充分持球,控制方面自然好
五夾純木回饋清晰,手感極之良好,不模糊
從師兄聽聞打過削球板好軟,但這塊一點也不過份,軟硬適中均衡,雖板面擁有較普通板稍大的防守板特質,但較硬的木材(自己打落感覺)提供了足夠支撐,在攻擊方面也不遜色
由於此板評測較難找,提供一下網上關於PD結構給大家參考
Black locust-Limba-Ayous-Limba-Black locust
小弟見識淺薄,望師兄解答一下Black locust是怎樣的木材,有何特質,我在網上搜尋只翻成黑色蝗蟲。。。
網上有人話PD的確控制佳,但速度慢了點,亦有人話又好削又好攻,睇黎要靠自己試打下
正手攻球:控制優秀無可厚非,落點容易掌握,速度缺乏的感覺倒是沒有,比起一般五夾板威力不算弱,咬波好o既特質發起力上黎都可以比到威脅對手
當然如果你要同硬七夾呢類黎比較個人就認為唔係太合理
或者係配膠方面都好有影響,例如我塊PD配返塊狂飆,亦都可能係我本身對佢速度不抱很大期望,始終係自身感受,人人唔同在所難免
整體黎講,我都好滿意,係值得一試既削球板,$360我覺得真係交足功課仲綽綽有餘,頗適合剛試削球/防守的新手,當然高手用都冇問題,比左位師兄試都有很高的評價:攻守打法隨心所欲,削球穩定,美中不足是雖然反攻有力,但相持時的連環攻擊欠奉,這方面比他用過的朱世赫稍遜一籌,但好於松下(舊版)和蝴蝶的defence,是一塊攻防較中性而帶有很清晰手感的削球板,適合追求控制,打法較中立的球手使用
tibhar底板設計又靚, 性能、品控又好,仲要咁o既價錢,真係引死人,搞到近期中意左tibhar,可能下次想買野留意下tibhar;啲膠又啱自己,用過MXP同d.tecs都好中意,雖然tibhar冇乜宣傳,但佢啲產品咁正真係夠哂吸引,又有心思又有品質(買唔起butterfly揀tibhar啦)

kitson

支持

Penguin

第一次用削球板好驚軟得濟打唔慣,要好大力先過到網,最後選擇了一塊很熱門的長膠------Tibhar grass d.tecs ,原因是他有內能,理應比其他長膠快(事實也是)同時此膠號稱最強長膠(當然也算是最貴長膠),加上底板是tibhar,應該會有化學屬性加成(打機太多),何況聽講好耐用,唔易斷粒
雖然係貴,唔理喇豁出去買塊返屋企啦!
上到鋪頭當然要摸下,膠粒軟而有延性,證明打球容易作出變化,而高延性又有減少斷粒o既作用(有人話佢可以拉到3倍長都冇事,品質佳,我當然冇試,你估塊膠我架咩)
今次選取了0.9mm海綿係因為自己想玩下削球,所以選取較為中性o既厚度,唔會太難控同埋過彈
落左場打兩手,速度快是意料之內,海綿反彈力大,的確係一塊進攻長膠,感覺較適合配稍軟的底板例如五夾,本次配上o既PD都唔錯,配硬底板的話可能咬不住球一下子彈出去了
雖然係0.9mm海绵,但其怪異度仍然存在,球的下降期有飄和少許沉的跡象,加上速度上的優勢,若能控制反彈速度作出完整動作回擊,就能令對手難以作出反應去接球,容易造成失誤,為自己製造機會球作反攻
同樣,本人技術差,順便請師兄試埋反手的長膠,佢削得好轉,一時正手反膠一時反手長膠係檯底削變化好大,真係玩到我死死下,完全食哂轉,長膠削一削經常搞到我一掂板就落網,佢話如果控制好啲o既高手貼網過包我炒都炒唔起,d.tecs 自身o既速度同PD o既控制互補長短,用黎削球好適合,尤其係打攻擊長膠o既人,不過 d.tecs 有少少似生膠o既速度,要削得住就最好配返防守板(手感極好人士可無視),特別係新手,唔好為左玩長膠又追求速度而選擇配太硬的板,新手控唔住咁就埋沒左長膠特性,不如玩其他粒仔仲好,即使你想主要以「拍薑」取勝,但其他技術無論如何始終也需要有,否則比如對手熟悉你o既打法,下下開反手位低球比你,你反手就廢了,其他種類的膠也是一樣,不過長膠更注重變化,太硬o既板就有礙學習基本功
講到呢到就唔講咁多,始終呢個帖係評測乒器,技術同選材方面就不作詳細討論

Penguin

寫咗咁多感覺自己開始變得語無倫次
現在將會介紹本次評測的配角
底板clipper wood的評測很多,見解都跟大眾大同小異,不會作詳盡及個別的評測,而正手的狂飆3也在上面講了,所佔篇幅不會太長,篇幅主要放在SuperBlock及一些比較
由於在網上看到CL適合正反反長的配置,但上次的配置自己不太滿意,索性換個新配置,CL正手配狂3實在很多人推薦,相信這個沒有甚麼異議,而選擇的原因在上面也講述過,不在此再次重複
在同一種膠的情況下,最好就是比較下底板
CL正手攻擊力比PD強,這很正常甚至有點廢話,畢竟一塊是五夾削球板,另一塊是硬七夾
CL正手攻球固然有一定水準,但與PD在近台控制方面比較下,就顯露出手感較模糊的缺點,這麼彈的底板在擺短能力就不太理想了,不利於控制型的打法,新手可能形成擺短不短,劈長不長的情況
由於CL是一塊硬底板,所以反手想配一塊OX的長膠來減低彈力,而希望它能有較慢點的速度,難得揀無綿,要怪就要最怪,呢塊膠其實都想試一段時間喇,仲要店舖竟然有售,終於抱住嘗試玩新野o既心態,買左Dr.N一塊在2008年的已禁長膠------SuperBlock(下稱SB)
聽聞此膠是最邪長膠之一,其超長而軟o既顆粒,將膠皮o既怪異度發揮得淋漓盡致,在未禁之時為不少長膠高手所好,無奈其後被列入禁止比賽名單,以後只能成為坊間的玩具,叫不少使用SB的用家叫苦連天,本人甚至聽說有人至今仍未找到除SB以外喜愛的長膠,地位不能取代,今日就講下SB打後感
到達舖頭第一件事當然要循例摸下,「卒」下果然幾軟,但係我想講只要你㩒一㩒,係完全唔同一般長膠,手感獨一無二,個種軟到手指凹陷入去o既感覺難以形容,親身摸過先體會到,真係好期待打乒乓球o既日子試下
反手推擋真係好飄,啱啱開始打仲飄哂出街
再試下削,唔轉、唔快,搞到放高球咁,迅速被秒殺,CL本來手感已經麻麻,再加埋SB,打完個波出去逆旋轉好強,打完先知個波向邊到走,睇黎手感要求好高,我呢啲不自量力o既新手無從駕馭,只可以靠擋搞到對手唔適應中伏,比埋師兄試都話難削,摩擦面少到好難轉,適合閘波多過削,在稍後長膠比較也會有少量講解

Penguin

買新武器除左同師兄打當然唔少得同朋友黎個友誼賽
平時同呢兩位好朋友打友誼賽有勝有負
各人配置打左三局兩勝,賽果如下:
第一位對手:打法奇特,任何球都可無端端爆沖,嚇你一驚o既突擊型選手,不善旋轉
用PD打:連取兩盤,良好控制令我更敢去攻,唔會用長膠齋擋,有一下比佢殺都救到,輸o既都係平時啲分,失誤唔多
唔夠猴打多場三局二勝,輸一局,表現中規中矩,個人技術(力度控制)掌握未學好,有時退遠台擋冇比足夠向前落網,一係路線唔夠刁鑽被殺
之後又打多場就輸1:2, 最大原因係今次佢用左我塊龍張(氹氹轉讚返自己塊拍)
用CL打:總盤數輸2:1,第一盤開球失誤多,一開始已經輸5:0,最後灰左無乜鬥志輸埋;第二盤習慣返就贏返,表現正常;第三盤心理問題,好勝心太強冇乜好發揮,打到12:12把握唔到連輸兩球
第二位對手:喜歡打台內球落點,以下旋為主
用PD打:再次連取兩盤,真係難以置信,冇諗過器材上o既改變可以係勝負上有咁大唔同,故意約呢位朋友比賽就係驚只係第一個對手唔慣或我/佢一下子狀態好/唔好,增加實驗準確度,但出黎o既結果證明左唔係純粹巧合,而係我同PD之間合拍程度o既存在,尤其擋到唔少攻球真係好爽
CL打完結果都係贏唔到,今次仲連輸兩盤,比數雖然一路貼緊,但都過唔到頭,正手發大力就失控,好多都出檯
個人感覺CL其實不如一些人說很適合削球,板實在好硬,要高手先削得住,配OX/薄綿又太難控,厚又太彈,配膠都幾麻煩,唔係話CL差,只係削球打法黎講難以符合新手能力
因此如果新手打削球建議PD較適合,原因之前提及過可以參考

Penguin

用過三款長膠,每塊都各具特色,難分高下
本人認為適合自身打法更為重要
鑑於測試底板不同,加上自己水準低,發力不一,以下主觀感覺比較僅供參考,不能作實(好重要)
   速度: d.tecs > 388D-1 > SB
自製旋轉: d.tecs > 388D-1 > SB
 逆旋轉: SB > 388D-1 = d.tecs
 怪異度: SB > 388D-1 = d.tecs
   控制: 388D-1 > d.tecs > SB
新手建議388D-1,控制佳,而且夠哂經濟實惠,其他方面亦很平均,全面型選手也挺適合
推擋/放高球為主建議SB,名符其實的block,靠其撞擊得來的怪異度取勝,不太適合新手、求穩/削球的球友,速度及旋轉相對較弱,手感要求較高,會經常比賽的也不建議,禁左拎黎練都嘥氣
d.tecs 建議會以長膠進攻/反攻人士選用,有一定基本功為佳,因為快,控唔住質量就唔會出到,價格不菲,初試長膠不建議(除非你係我呢啲器材發燒友,一試無妨)
今次評測就到呢度,多謝大家支持
呢篇評測好遺憾未能夠即日完成,延遲了一日發佈,補返句:祝各位在新一年球技進步,身體健康
附上總重量

hungwahsun

多谢分享！！！！！！！！

Penguin

引用:

原帖由 kitson 於 2016-2-9 20:49 發表
支持

多謝支持

TomLai

atcf

謝謝分享，，，，，，，

saibear

暐仔

tomtom1995

非常正

raymondsir

閃人

Penguin

多謝大家支持
反應好好 好開心

andypoon

Thanks for sharing  

lwponglwpong

謝謝分享

sunnyfung1

謝謝分享